Að úða eða ekki úða

Jæja nú er sumarið að verða búið og fólk hætt að úða.
Ætli það sé ekki merki um gott sumar þegar þú getur séð úðara í hverjum garði. Reynar fannst mér fólk fara fullgeist í úðarana sumstaðar. Þið vitið að sumir eru með alveg fullt af grjóti eða hellum og einhverjar nokkrar plöntur á strjáli. Ég varð svoltið vör við það í sumar að fólk væri með úðarann á þetta grjót hjá sér, reyndar hefur mér skilis að það sé alveg óþarfi að vökva grjót þannig að mér fannst nú hinn mesti óþarfi að vera með úðarann á þessar 5 stjúpur þarna í beðinu, sennilega hefði verið nóg að fara með tveggja lítra gosflösku þarna í beðið. Einnig skilst mér að það sé óþarfi að vökva bíla og þvott á snúrum. Nágrannar mínir voru nefnilega svoltið í því að vökva bílinn hjá foreldrum mínum, okkur til ómældrar gleði, það er náttúrulega ekkert skemmtilegra en að keyra um á doppóttum bíl þegar rykið skolast til á bílnum. Það reyndar slapp til með þvottinn en það var oft mjótt á munum, um hvort okkar hefði betur við eða úðarinn.